شادی کے موقع پر مہندی لگانے کا حکم:

بصورتِ مسئولہ عورتوں کے لیے انفرادی طور پر شادی و خوشی کے موقع پر مہندی لگانا مستحب ہے، لیکن رسم و رواج کی پابندی اور گانا بجانا وغیرہ منکرات ناجائز ہیں، ان سب کا ترک لازم ہے ۔
ملاحظہ ہو احسن الفتاوی میں ہے: عورتوں کے لیے مہندی لگانا مستحب ہے، مگر آج کل جو مہندی کی رسم ہے کہ دوسری عورتوں کا بھی بڑا مجمع لگ جاتا ہے یہ کئی مفاسد کا مجموعہ ہے اس لیے اس سے احتراز لازم ہے، اپنے طور پر عورتیں مہندی لگا سکتی ہیں ۔ (احسن الفتاوی: ۸/۱٦۰) ۔
فتاوی محمودیہ میں ہے:
عورتوں کو مہندی لگانا درست ہے، بلکہ ان کے لیے مخصوص ہے کہ ہاتھ، پیر کو لگائیں، مردوں کو ان کی مشابہت اختیار کرنا درست نہیں ۔ (فتاوی محمودیہ: ۱۱/۲۱٤، مبوب و مرتب) ۔
حلال و حرام میں ہے:
عورتوں کے لیے چونکہ زیبائش و آرائش کی رعایت زیادہ کی گئی ہے اس لیے وہ مہندی بھی لگا سکتی ہیں، ہاتھوں میں بھی اور پاؤں میں بھی ۔ (حلال و حرام: ۲۰۹، از مولانا خالد سیف اللہ صاحب) ۔
واللہ سبحانہ و تعالی اعلم