طلاقِ ثلاثہ میں مفتی کے فیصلہ پر قاضی کے فیصلہ کی ترجیح:

بصورتِ مسئولہ قاضی کے فیصلہ کو مفتی کے فیصلہ پر ترجیح ہو گی، لہذا عورت اس شخص کے لیے حرام رہے گی، بدونِ حلالہ زوج اول کے لیے حلال نہ ہو گی، نیز عورت کے لیے اپنے نفس پر قابو دینا ناجائز ہوگا اگر شوہر راضی نہ ہو تو خلع کر کے رہائی حاصل کر لی جائے ۔
ملاحظہ فرمائیں بدائع الصنائع میں ہے:

المقلد إذا أفتاه إنسان في حادثة ثم رفعت إلى القاضي فقضي بخلاف رأي المفتي فإنه يأخذ بقضاء القاضي ويترك رأي المفتي لأن رأي المفتي يصير متروكاً لقضاء القاضي. (بدائع الصنائع في ترتيب الشرائع: ۷/٦، كتاب آداب القاضي، فصل في شرائط القضاء، سعيد).

مبسوط میں ہے:

وإذا كان الزوج غائباً أو كان يعتقد أن الطلاق غير واقع فعليه أن يتبع رأي القاضي

وكذا لو حكمنا فقيهاً فحكمه كفتواه لأن سببه تراضيهما لا ولاية ثابتة له حكماً فكان تراضيهما على تحكيمه كسؤالهما إياه والفتوي لا تعارض قضاء القاضي فإذا قضي القاضي عليه بخلاف ذلك كان عليه أن يتبع رأي القاضي. (المبسوط للإمام السرخسي رحمه الله: ۱۰/۱۸۵، كتاب الاستحسان، باب الرجل يري الرجل يقتل أباه أو غيره، دار الفكر).

ایضاح النوادر میں ہے:
اگر ایک ہی واقعہ سے متعلق صاحب معاملہ مفتی سے فتویٰ لے کر پھر قاضی سے فیصلہ حاصل کرتا ہے، اور مفتی نے دیانت پر فتویٰ دیا تھا اور قاضی نے قضاء اور ظاہر پر فتویٰ دے دیا، مثلاً شوہر نے بیوی سے کہا کہ تجھے طلاق، طلاق، طلاق، اور کہتا ہے کہ میں نے صرف ایک طلاق کی نیت کی تھی تو مفتی نے دیانت کا اعتبار کر کے سائل کی نیت و ارادہ کے مطابق ایک طلاق پر فتویٰ دے کر رجعت کا حکم دے دیا، اور قاضی نے ظاہر کا اعتبار کر کے تین طلاق کا فیصلہ دے کر رجعت سے منع کر دیا تو ایسی صورت میں صاحبِ معاملہ پر مفتی کا فتویٰ چھوڑ کر قاضی کے فیصلہ پر عمل کرنا واجب ہے ۔ (ایضاح النوادر: جلد دوم: ۹۲، مکتبہ علمیہ) ۔
واللہ سبحانہ و تعالی اعلم