سیاسی پارٹی میں تعاون کے لیے سودی رقم دینے کا حکم:

سود کی رقم رفاہِ عام میں خرچ کرنے کے متعلق علماء کا اختلاف ہے جو پہلے مذکور ہوا، البتہ صورتِ مسئولہ میں چونکہ مالی تعاون کرنے میں غیر مسلم ملک میں عام مسلمانوں کا مفاد وابستہ ہے، اور غیر مسلم حکومت ہونے کی وجہ سے اس طرح سود کی رقم جمع کر کے تعاون کر دیا جائے مسلمان خود استعمال نہ کریں تو اس کی گنجائش ہونی چاہیے ۔
ملاحظہ ہو کفایت المفتی میں ہے:
سوال: کیا سود کی رقم دینی تعلیم، رفاہِ عام اور مسلمان فقراء پر خرچ کی جا سکتی ہے؟
جواب: سود کی رقم وصول کر کے مساکین وغیرہ پر قرضدار مسلمانوں کے قرضہ کی ادائیگی پر تعلیم (پرائمری یا دینیات) پر اور ہر رفاہِ عام کے کام پر خرچ کیا جا سکتا ہے ۔ (کفایت المفتی: ۸/٦۸) ۔
جدید فقہی مسائل میں ہے:
بینک کے سود کے سلسلہ میں یہ یاد رکھنا چاہیے کہ نہ اس کو اپنی ذات پر خرچ کیا جا سکتا ہے اور نہ صدقہ میں دیا جا سکتا ہے اس کے علاوہ جو صورتیں ہوں ان میں صرف کیا جا سکتا ہے مثلاً کسی ضرورت مند کی انفرادی ضرورت کی تکمیل کسی اجتماعی فائدہ کا کام کر دینا جیسے کنواں کھودنا وغیرہ، مسجدوں اور مدارس میں تو یہ رقم نہ لگائی جائے لیکن بیت الخلاء کی تعمیر کی علماء نے اجازت دی ہے ۔ (جدید فقہی مسائل، جلد اول، ص ۲۵۳) ۔
مزید ملاحظہ ہو: (فتاوی رحیمیہ: ۲/۹۰ ۔ و احسن الفتاوی: ۷/۱٦) ۔
خلاصہ یہ ہے کہ چونکہ بہت سارے علماء تملیکِ فقراء کو ضروری سمجھتے ہیں اس لیے تملیک فقیر کے بعد اس قسم کے کاموں میں خرچ کرنے میں اختلاف سے نکلنا ہوگا، اور بالاتفاق درست ہوگا ۔
واللہ سبحانہ و تعالی اعلم