ولیمہ میں مشروط ہدایا کا حکم:

یہ تبرعِ مشروط ہے اور اس میں دوسری جانب سے جو دیا جاتا ہے اس کی کمی اور خراب کوالٹی کی وجہ سے کبھی ناراضگی اور غیبت ہوتی ہے، غریب لوگوں کے لیے یہ رسم وبالِ جان ہے اس لیے اس رسم سے بچنا ضروری ہے ۔ قرآنِ کریم میں اللہ تعالی فرماتے ہیں:

﴿وماآتيتم من ربا ليربو في أموال الناس فلا يربو عند الله﴾ (سورة الروم: ۳۹).

تفسیر عثمانی میں ہے:
بعض مفسرین نے آیت کا یہ مطلب بیان کیا ہے کہ جو آدمی کسی کو کچھ دے اس غرض سے کہ دوسرا اس کو بڑھ کر احسان کا بدلہ کرے گا تو یہ دینا اللہ تعالی کے یہاں موجبِ برکت و ثواب نہیں گو مباح ہے ۔ (تفسیر عثمانی، ص۵٤۳) ۔
معارف القرآن میں یہ تفسیر حضرت عبد اللہ بن عباس رضي الله عنه اور امام شافعی رحمه الله سے منقول ہے ۔ (معارف القرآن: ٦/۱۵۸، از مولانا ادریس کاندھلوی صاحب) ۔
اصلاح الرسوم میں حضرت تھانوی رحمه الله فرماتے ہیں:
یہ قرض مشروط کی طرح ہے کیوں کہ جب اس کی دعوت میں پیسہ دیں گے تو وہ ان کی دعوت میں بھی پیسہ دیں گے اگر چہ لفظاً نہیں کہے لیکن حسبِ قاعدہ "المعروف کالمشروط" اور یہ صحیح نہیں ۔ (اصلاح الرسوم: ٤۱) ۔
لیکن امداد الاحکام میں حضرت مولانا ظفر احمد تھانوی رحمه الله کے کلام سے معلوم ہوتا ہے کہ اس جیسا معاملہ تبرعِ مشروط ہوتا ہے ۔ (امداد الاحکام: ۳/۳۸٦، ٦۰٦) ۔
ہاں تبرعِ مشروط جائز ہے لیکن بہت سارے مفاسد کی وجہ سے اس سے اجتناب کرنا چاہیے ۔
واللہ سبحانہ و تعالی اعلم