بحالتِ صوم آکسیجن (oxygen) لینے کا حکم:

آکسیجن انسانی زندگی کے بقا کے لیے جزء لا ینفک ہے، انسان ہر سانس میں آکسیجن لیتا ہے لیکن بعض مرتبہ دمہ کی بیماری والوں کے لیے یہ نا کافی ہو جاتا ہے تو مصنوعی آکسیجن (جو صاف ستھری ہوا ہے) دی جاتی ہے تاکہ زندگی بحال رہے اور دمہ کی تکلیف سے نجات ملے، اور صاف ستھری ہوا کا جسم میں جانا مفسدِ صوم نہیں ہے ۔ ملاحظہ ہو علامہ شامی رحمه الله فرماتے ہیں:

والذي ذكره المحققون أن معنى الفطر وصول ما فيه صلاح البدن إلى الجوف أعم من كونه غذاء أو دواء. (فتاوى الشامي: ۲/٤۱۰، سعيد).

علامہ ابوبکر کاسانی رحمه الله بدائع الصنائع میں فرماتے ہیں:

وما وصل إلى الجوف أو إلى الدماغ عن المخارق الأصلية كالأنف والأذن والدبر بأن يستعط أو احتقن أو أقطر في أذنه فوصل إلى الجوف أو إلى الدماغ فسد صومه، أما إذا وصل إلى الجوف فلا شك فيه لوجود الأكل من الصورة، وكذا إذا وصل إلى الدماغ لأنه له منفذ إلى الجوف فكان بمنزلة زاوية من زوايا الجوف. (بدائع الصنائع: ۲/۹۳، سعيد).

جدید فقہی مسائل میں مرقوم ہے: اگر آکسیجن کے ساتھ کوئی دوا نہ ہو تو روزہ فاسد نہیں ہونا چاہیے، کیوں کہ یہ سانس لینا ہے اور سانس کے ذریعہ ہوا لینا نہ مفسدِ صوم ہے اور نہ اس پر اکل و شرب کا اطلاق ہوتا ہے ۔ (۱/۱۸۸) ۔
کتاب المسائل میں مذکور ہے: روزہ میں اگر آکسیجن کے ذریعہ سانس لیا جائے تو اس سے روزہ فاسد نہیں ہوتا، کیوں کہ آکسیجن محض ایک صاف ستھری ہوا ہے، اس کا بدن میں جانا مفسدِ صوم نہیں ۔ (کتاب المسائل: ۲/۱۵٤) ۔
خلاصہ یہ ہے کہ اگر آکسیجن ایسی ہے کہ اس میں ہوا کے ساتھ کچھ بھاپ اور رطونت خارج ہوتی ہے اور ناک میں داخل ہوتی ہے تو یہ مفسدِ صوم ہے، اس سے روزہ فاسد ہو جائے گا اور اگر بلا رطوبت فقط صاف ستھری خالص ہوا خارج ہوتی ہے تو مفسدِ صوم نہیں ہے اس سے روزہ فاسد نہیں ہوگا ۔
مزید ملاحظہ ہو : (روزے کے مسائل کا انسائیکلوپیڈیا، ضمیمہ، ص: ۹، و علم تشریح الابدان: ۱۱۰، ۱۱۸) ۔
واللہ سبحانہ و تعالی اعلم