حدیث میں نکاح کو نصف الایمان بتایا ہے، اس حدیث کی تحقیق:

امام طبرانی رحمه الله نے اپنی کتاب
"المعجم الأوسط"
میں ایک روایت نقل فرمائی ہے جس کا مفہوم یہ ہے: جس نے نکاح کیا اس نے نصفِ ایمان کو مکمل کر لیا، اب نصفِ ثانی کے بارے میں اللہ تعالی سے ڈرے ۔ لیکن یہ روایت ضعیف ہے ۔ روایت کے الفاظ ملاحظہ ہو :

عن أنس بن مالك رضي الله عنه قال: قال رسول الله ﷺ:" من تزوج فقد استكمل نصف الإيمان فليتق الله في النصف الباقي ". (رواه الطبراني في الأوسط: ۷/۳۳۲/ ۷٦٤۷، ط: القاهرة).
قال الهيثمي في المجمع: رواه الطبراني في الأوسط بإسنادين وفيهما يزيد الرقاشي وجابر الجعفي وكلاهما ضعيف وقد وثقا. (مجمع الزوائد: ٤/٤٦۳، دار الفكر).

امام طبرانی نے دو سند کے ساتھ یہ روایت نقل کی ہے لیکن دونوں سندیں ضعیف ہیں ؛ ایک میں یزید رقاشی اور دوسری میں جابر جعفی ضعیف راوی ہیں ۔
اس روایت کے ہم معنی دوسری روایت مسندِ ابی یعلی میں مذکور ہے ۔ ملاحظہ ہو :

عن أنس بن مالك رضي الله عنه أن النبي ﷺ قال: من تزوج فقد أعطي نصف العبادة. (رواه أبو يعلي في مسنده، رقم: ٤۳٤۹).
وقال الهيثمي في المجمع: رواه أبو يعلى وفيه: عبد الرحيم بن زيد العمي وهو متروك. (مجمع الزوائد: ٤/٤٦۳، دار الفكر).

خلاصہ یہ ہے کہ مذکورہ بالا دونوں احادیث ضعیف ہیں، اور نصفِ ایمان کا مطلب یہ ہے کہ شہوت کی دو قسمیں ہیں: ۱) شہوتِ بطن ؛ کھانا پینا ۔ ۲) شہوتِ فرج، اور نکاح شہوتِ فرج کو شریعت کے موافق پورا کرنا ہے، اس لیے یہ نصف الایمان بن گیا ۔
واللہ سبحانہ و تعالی اعلم