سیڈیوں کے حقوق الطبع محفوظ کرنے کا حکم:

حق ایجاد ایسا حق ہے جس کو شریعت نے تسلیم کیا ہے، کہ جس شخص نے کوئی چیز ایجاد کی تو اس کو محفوظ کرنے اور بیچنے یا اس پر منافع لینے کا وہ حقدار ہے، اگر ہر کس و نا کس کو اس کے نقل کرنے، بیچنے اور منافع لینے کی اجازت دی جائے تو محنت و مشقت اُٹھانے والا اپنی محنت کے پھل سے محروم ہو جائے گا، ہاں کوئی شخص اپنے استعمال کے لیے نقل کرنا چاہے تو اس کی گنجائش ہے، جب کہ بیچنے اور منافع حاصل کرنے کا ارادہ نہ ہو ۔
حدیث شریف میں ہے:"
من سبق إلى ما لم يسبقه إليه مسلم فهو له ". (رواه البيهقي في سننه الكبرى: ٦/۱٤۲، كتاب إحياء الموات، وأبو داود: ۲/٤۳۷، باب في إقطاع الأرضين).

شارحِ بخاری ابن بطال قرطبی رحمه الله لکھتے ہیں کہ جن حقوق میں عام لوگ برابر ہیں اگر کوئی ان میں سبقت کر لے تو سبقت کرنے والا زیادہ حقدار ہوگا ۔
من سبق إلى المواضع عند العالم أو المسجد أو غيره مما حقوق الناس فيه متساوية أنه أحق به. (شرح صحيح البخاري: ٦/۷٦).

نیز شرحِ مجلہ میں حقوقِ مجردہ کا عوض لینے کو جائز قرار دیا ہے ۔ ملاحظہ ہو شرحِ مجلہ میں مرقوم ہے:

قال: وعلى ما ذكره من جواز الاعتياض عن الحقوق المجردة بمال، ينبغي أن يجوز الاعتياض عن حق التعلي، وعن حق الشرب، وعن حق المسبل بمال، لأن هذه الحقوق لم تثبت لا صحابها لا جل دفع الضرر عنهم، بل تثبت لهم ابتداء بحق شرعي

الخ. (شرح المجلة لمحمد خالد الأتاسي: ۲/۱۲۱).

نیز حق طباعت و حق تصنیف کو محفوظ کر کے اس کا معاوضہ لینے کو درجِ ذیل کتبِ فتاوی میں جائز قرار دیا ہے:
(نظام الفتاوی: ۲/۳۱٤، و فتاوی رحیمیہ: ۳/۲٤۲، و فتاوی حقانیہ: ٦/۱۱۱، و فقہی مقالات: ۱/۲۲۳، و جدید فقہی مسائل: ۱/۱۷۸، و اسلام اور جدید معاشی مسائل: ۳/۵۸)۔
مزید تفصیل کے لیے ملاحظہ کیجیے: (فتاوی دار العلوم زکریا: ۵/۳۱۵، زمزم)۔
واللہ سبحانہ و تعالی اعلم