کثرتِ فوائت کی وجہ سے سننِ رواتب کی جگہ قضاء فوائت کا حکم:

قضائے فوائت کی اہمیت اگر چہ زیادہ ہے تب بھی فقہاء نے سننِ رواتب کا ادا کرنا ضروری قرار دیا ہے لہذا صورتِ مسئولہ میں فرائض کے بعد سنتیں پڑھے اور نفل کی جگہ فوائت پڑھ لے ۔
ملاحظہ ہو شامی میں ہے:

الاشتغال بقضاء الفوائت أولى وأهم من النوافل إلا السنن المفروضة. (شامي: ۲/۷٤، سعيد. وكذا في الهندية: ۱/۱۲٥. وكذا في حاشية الطحطاوي على مراقي الفلاح: ۲٤۳، قديمي)

احسن الفتاوی میں ہے:
قضاء نمازیں پڑھنے کے لیے سنتِ مؤکدہ اور تراویح نہ چھوڑیں بلکہ حضراتِ فقہاء نوافلِ ماثورہ مثل چاشت، اوابین اور صلاۃ التسبیح وغیرہ کو بھی قضا پر مقدم فرماتے ہیں مگر یہ اس صورت میں معلوم ہوتا ہے کہ اسبابِ ظاہرہ کے پیشِ نظر موت سے قبل نمازوں سے سبکدوشی کی توقع ہو اگر قضا نمازیں بہت زیادہ ہیں اور عمر کم نظر آ رہی ہے تو اصولاً نوافل پر قضا کو ترجیح دینا لازم ہے ۔ (احسن الفتاوی: ٤/۱۹)
فتاوی دار العلوم دیوبند میں ہے:
وقتیہ سننِ مؤکدہ کو نہ چھوڑنا چاہیے اور فوائت کو اوقاتِ فارغہ میں ادا کرنا چاہیے اور یہ ظاہر ہے کہ قضاءِ فوائت اہم ہے لیکن اگر دونوں کام ہو سکیں کہ فوائت بھی پڑھے اور سننِ مؤکدہ کو بھی نہ چھوڑے تو یہ بہتر ہے ۔ (فتاوی دار العلوم دیوبند: ٤/۳٤٤) ۔
واللہ سبحانہ و تعالی اعلم