مکان کا کرایہ کئی سالوں سے ادا نہیں کیا تو اس پر زکوٰۃ کا حکم:

صورتِ مسئولہ میں کرایہ کی رقم پر قبضہ کرنے سے پہلے زکوٰۃ نہیں ہے اور وصول کرنے کے بعد سال گزرنے پر صرف اسی سال کی واجب ہو گی گذشتہ سالوں کی بھی لازم نہیں ہے ۔
ملاحظہ ہو البحر الرائق میں ہے:

ولو آجر عبد ه أو داره بنصاب إن لم يكونا للتجارة لا تجب ما لم يحل الحول بعد القبض. (البحر الرائق: ۲/۲۰۸، كوئٹه).

شامی میں ہے:

لكن قال في البدائع أن رواية ابن سماعة أنه لا زكاة فيه حتى يقبض المائتين ويحول الحول من وقت القبض هي الأصح من الروايتين عن أبي حنيفة رحمه الله، ومثله في غاية البيان. (شامي: ۲/۳۰٦، باب زكاة المال، سعيد).

جدید فقہی مسائل میں ہے:
تاہم دینِ قوی و اوسط کی تعریف پر نظر کی جائے تو صاف معلوم ہوتا ہے کہ فقہاء کی ان عبارتوں میں اجرت سے غلام ہی کی اجرت مراد ہے ۔ اس لئے کہ دین کی ان دونوں قسموں میں دین کے لئے مال کا عوض ہونا بنیادی اہمیت رکھتا ہے اور ظاہر ہے کہ غلام ہی کی خدمت حنفیہ کے یہاں مال کے درجہ میں ہے، اس طرح آزاد کی اجرت دینِ ضعیف قرار پاتی ہے، جس پر ملازمین کو ملکیت تو حاصل ہے "ید" و قبضہ حاصل نہیں ہے، لہذا اس رقم پر گزرے ہوے دنوں کی زکوٰۃ واجب نہیں ہونی چاہیے، علماء ہند میں مفتی محمد شفیع صاحب رحمه الله اور مفتی جمیل احمد صاحب رحمه الله نے بھی اسی کو ترجیح دیا ہے کہ اس رقم میں گزشتہ ایام کی زکوٰۃ واجب نہ ہو گی ۔ (جدید فقہی مسائل: ۱/۲۱٦، نعیمیہ)
جدید فقہی مباحث میں ہے:
فقہاء کرام کی ان تصریحات سے معلوم ہوا کہ ملک تام کے لئے ملکیت اور قبضہ و تصرف دونوں کا ہونا ضروری ہے، ملک تام کو دوسرے لفظوں میں ملک مطلق اور ملک کامل بھی کہتے ہیں، چنانچہ بدائع الصنائع میں ملک مطلق کی شرح وہی کی گئی ہے جو ابھی اوپر ملک تام کی گزری کہ مالک کو شیٔ پر ملکیت اور قبضہ و تصرف دونوں حاصل ہو، بدائع الصنائع کی عبارت یہ ہے:

"منها الملك المطلق وهو أن يكون مملوكاً له رقبة ويداً". بدائع: ۲/۹، شامي: ۲/٤
۔ (جدید فقہی مباحث: ۷/۵۳۵، ادارۃ القرآن و العلوم الاسلامیہ) ۔
دوسری جگہ ہے:
فرضیت زکوٰۃ کے لئے مال پر مالک کی ملکیت تام ہونا ضروری ہے اگر مالک کو مال پر ملکیت تام حاصل ہے تو اس صورت میں مالک پر اس مال میں زکوٰۃ فرض ہے ورنہ نہیں ۔ فتاوی عالمگیری: ۱/۱۷۲، شامی: ۱/۵ ۔ (جدید فقہی مباحث: ۷/۵۳٦، ادارۃ القرآن و العلوم الاسلامیہ) ۔
مزید ملاحظہ ہو: احسن الفتاوی: ٤/۲٦۱ ۔
واللہ سبحانہ و تعالی اعلم