قسط وار زکوٰۃ ادا کرنے کا حکم:

صورتِ مسئولہ میں زکوٰۃ کی رقم قسط وار ادا کرنا بھی درست اور صحیح ہے، اس سے زکوٰۃ ادا ہو جائے گی ۔
ملاحظہ ہو در مختار میں ہے:

وشرط صحة أدائها نية مقارنة له أي للأداء ولو حكماً أو مقارنة بعزل ما وجب كله أو بعضه. (الدر المختار: ۲/۲۷۰، سعيد).

کتاب الفتاوی میں ہے:
زکوٰۃ کی ادائیگی میں شریعت نے بڑی آسانی رکھی ہے، نصاب پر سال گزرنے پہلے بھی زکوٰۃ ادا کی جا سکتی ہے، سال گزرنے کے بعد بھی مہلت ہے کہ حسبِ مواقع و حالات تاخیر سے ادا کر سکتا ہے، البتہ کوشش کرنی چاہیے کہ حتی المقدور جلد سے جلد زکوٰۃ ادا کر دے، اسی طرح زکوٰۃ یک مشت بھی دی جا سکتی ہے، اور قسطوں میں بھی، لہذا ماہانہ ایک سو روپے کے لحاظ سے زکوٰۃ ادا کرنا بھی کافی ہے ۔ (کتاب الفتاوی: ۳/۳۲۳، زمزم) ۔
فتاوی محمودیہ میں ہے:
کل رقم کا فوراً رمضان میں صرف کرنا ضروری نہیں بلکہ تھوڑی تھوڑی کر کے ادا کرنے سے بھی زکوٰۃ ادا ہو جاتی ہے ۔ (فتاوی محمودیہ: ۹/٤٦۷، مبوب و مرتب) ۔
واللہ سبحانہ و تعالی اعلم