پیداوار کا عشر ادا کرنے کے بعد اس کی قیمت پر زکوٰۃ کا حکم:

ایک مرتبہ فصل کا عشر ادا کرنے کے بعد اب نہ اس پر دوسری مرتبہ عشر واجب ہے اور نہ زکوٰۃ واجب ہے، ہاں فروخت کرنے کے بعد اس کی رقم کو دوسرے نصاب کے ساتھ ملا کر سال گزرنے پر زکوٰۃ ادا کرنی ہو گی، لہٰذا شخص مذکور رمضان المبارک میں دیگر اموال کی زکوٰۃ ادا کرتے وقت تین لاکھ روپے کی بھی زکوٰۃ ادا کرے گا ۔ ملاحظہ ہو الجوہرۃ النیرۃ میں ہے:

قوله ومن كان له نصاب فاستفاد في أثناء الحول مالاً من جنسه ضمه إلى ماله وزكاه، سواء كان المستفاد من نمائه أو لا وبأي وجه استفاده ضمه سواء كان بميراث أو هبة أو غير ذلك وشرط كونه من جنسه. (الجوهرة النيرة: ۱/۱۲۰، ط: الخيرية). (وكذا في بدائع الصنائع: ۲/۱٤، والفتاوى الهندية: ۱/۱۷۵، وتبيين الحقائق: ۱/۲۷۲، إمداديه، وفتح القدير: ۲/۱۹۵، دار الفكر).

احسن الفتاوی میں مذکور ہے:
پیداوار کا عشر الگ فرض ہے اور پیداوار فروخت کی تو اس سے حاصل ہونے والی رقم پر زکوٰۃ الگ فرض ہے
لأن الحقين لم يتعلقا بمحل واحد فإن العشر حق الأرض النامية بالخارج حقيقة وزكاة النقود حق المال النامي تقديراً

قال ابن نجيم رحمه الله في زكاة مال التجارة إذا دخل من أرضه حنطة تبلغ قيمتها قيمة نصاب ونوى أن يمسكها ويبيعها فأمسكها حولاً لا تجب فيها الزكاة. (البحر الرائق: ۲/۲۰۹)،
عبارتِ مذکورہ میں عدمِ وجوبِ زکوٰۃ کی علت یہ بیان کی گئی ہے کہ حنطہ مالِ تجارت نہیں، اس سے ثابت ہوا کہ بیع حنطہ کی صورت میں نقود پر زکوٰۃ فرض ہو گی،
لأنها متعينة للتجارة خلقة. (
احسن الفتاوی: ٤/۳٦۰) ۔
آپ کے مسائل اور ان کا حل میں ہے:
ایک بار عشر ادا کر دینے کے بعد جب تک اس کو فروخت نہیں کیا جاتا اس پر نہ عشر ہے، نہ زکوٰۃ اور جب عشر ادا کر دینے کے بعد فصل فروخت کر دی تو اس سے حاصل شدہ رقم پر زکوٰۃ اس وقت واجب ہو گی جب اس پر سال گزر جائے گا یا اگر یہ شخص پہلے سے صاحب نصاب ہے تو جب اس کے نصاب پر سال پورا ہو گا تو اس وقت اس رقم کی بھی زکوٰۃ ادا کرے گا ۔ (آپ کے مسائل اور ان کا حل: ۵/۱۸۳) ۔
واللہ سبحانہ و تعالی اعلم