اسلامی اسکول کے بچوں کی فیس زکوٰۃ کی رقم سے وصول کرنے کا حکم:

زکوٰۃ کی رقم شرعاً ان فقراء اور مساکین کو مالکانہ طور پر دینا ضروری ہے جو مالکِ نصاب نہ ہوں، نصاب کی مقدار ساڑھے باون تولہ چاندی یا ساڑھے سات تولہ سونا یا اس کی مقدار رقم یا ضرورت سے زائد سامان ہے، اسکول میں آنے والے بچے اگر بالغ ہوں اور وہ خود مالکِ نصاب نہ ہوں تو ان کو زکوٰۃ دی جا سکتی ہے، اگر ان کے والد مالدار ہوں تو کوئی حرج نہیں، نیز زکوٰۃ میں یہ بتلانا بھی ضروری نہیں کہ یہ زکوٰۃ کی رقم ہے، بلکہ زکوٰۃ عیدی، تحفے، وظیفے وغیرہ کے نام سے بھی دی جا سکتی ہے، ہاں زکوٰۃ میں فقیر کی تملیک ضروری ہے ۔
اسکول میں آنے والے بچے اگر نابالغ ہوں اور ان کے والد حضرات نادار ہوں صاحبِ نصاب نہ ہوں، تو ایسے بچوں کو بھی زکوٰۃ کی رقم جس عنوان سے بھی ہو دی جا سکتی ہے ۔ ہاں جن بچوں کے والد صاحبِ نصاب ہوں اور وہ بچے نابالغ ہوں ان بچوں کو زکوٰۃ شرعاً نہیں دی جا سکتی، جو بچے زکوٰۃ کے مستحق ہوں ان کو مالکانہ طور پر زکوٰۃ دے کر پھر یہی رقم ان سے بطور فیس وصول کی جا سکتی ہے، اگر کسی کے گھر پر ٹی وی یا وی سی آر ہو اور اس کی قیمت نصاب کو پہنچتی ہو تو وہ مستحق زکوٰۃ نہیں ہے، کیوں کہ یہ دونوں چیزیں ضرورت سے زائد ہیں، اور ان کی قیمت بقدر نصاب ہے، ہاں اگر ٹی وی اور وی سی آر بچوں کے والد کے نہ ہوں بلکہ والدہ کے ہوں تو والد کو نادار سمجھا جائے گا، اور اس کے وہ نابالغ بچے جو زکوٰۃ پر قبضہ کرنا جانتے ہوں مستحق زکوٰۃ ہوں گے ۔
اس مسئلہ کے دلائل اوپر والے مسئلہ میں ملاحظہ کیے جا سکتے ہیں ۔
واللہ سبحانہ و تعالی اعلم