متمتع عمرہ کرنے کے بعد مدینہ طیبہ چلا گیا پھر واپسی پر عمرہ کا حکم:

صورتِ مسئولہ میں مدینہ طیبہ سے واپسی پر دوسرا عمرہ کرنے کی گنجائش ہے اور تمتع پر تمتع بھی شمار نہیں ہوگا، البتہ صرف حج کا احرام باندھنا بہتر ہے ۔
فتاوی محمودیہ میں ہے:
جس شخص نے اشہر حج میں عمرہ کر لیا ہے اس کے بعد مدینہ طیبہ میں حاضر ہوا، پھر اس سال حج کر کے وطن واپس ہوگا، امام صاحب کے نزدیک وہ شخص متمتع ہے، اس کو ایک عمرہ کر لینے کے بعد حج سے پہلے مدینہ سے چل کر عمرہ کرنے سے امام صاحب منع فرماتے ہیں، اور صاحبین کے نزدیک مدینہ طیبہ چلے جانے کی وجہ سے اس کا تمتع باطل ہو گیا، اب اگر دوبارہ وہ عمرہ کرے گا تو تمتع صحیح ہو جائے گا ۔ (فتاوی محمودیہ: ۱۰/۳۹۳، مبوب و مرتب) ۔
احسن الفتاوی میں ہے:
اگر کوئی آفاقی اشہر حج میں عمرہ کرنے کے بعد مدینہ منورہ یا جدہ وغیرہ چلا جائے تو واپسی کے وقت اس کے لیے حج افراد کا احرام باندھنا بہتر ہے، امام صاحب رحمه الله کے نزدیک وطن اصلی کے سوا کسی دوسرے مقام کی طرف سفر سے تمتع باطل نہیں ہوتا اور صاحبین رحمه الله کے نزدیک باطل ہو جاتا ہے، چونکہ پہلا عمرہ تمتع کا شمار نہ ہوا اس لیے اب نئے سرے سے تمتع یا قران جو بھی چاہے کر سکتا ہے، اور امام صاحب رحمه الله کے مذہب کے مطابق وہ بحکم مکی ہے اس لیے قران تو نہیں کر سکتا، البتہ اس کا تمتع کا عمرہ باقی ہے، اور اس کے بعد حج سے قبل دوسرے عمرہ کا جواز مختلف فیہ ہے، قول اعدل یہ ہے کہ آفاق ( بلکہ مکہ سے بھی جائز ہے) سے جائز ہے، اس لیے مدینہ طیبہ سے واپسی پر عمرہ کا احرام باندھنے میں چنداں حرج نہیں، مع ہذا اختلاف سے بچنے کے لیے صرف حج ہی کا احرام باندھنا بہتر ہے ۔ (احسن الفتاوی: ٤/۵۱٤) ۔
واللہ سبحانہ و تعالی اعلم