متمتع کے لیے حج کا احرام منی سے باندھنے کا حکم:

بصورتِ مسئولہ شخص مذکور عمرہ سے فارغ ہونے کے بعد مکہ میں مقیم ہونے کی وجہ سے اہل مکہ کے حکم میں ہے اور اہل مکہ کے لیے میقات پورا حرم ہے حج کے احرام کے لیے اور منی حرم شریف میں داخل ہے بنا بریں اس کا احرام صحیح ہے اور حج بھی صحیح ہو گیا، ہاں حج کا احرام مسجدِ حرام سے باندھنا افضل ہے ۔
ملاحظہ ہو شرحِ لباب المناسک میں ہے:

فصل في الصنف الثالث وهم من كان منزله في الحرم، كسكان مكة ومني فوقته الحرم للحج ومن المسجد أفضل أو من دويرة أهله

وكذلك أي مثل حكم أهل الحرم كل من دخل الحرم من غير أهله وإن لم ينو الإقامة به كالمفرد بالعمرة والمتمتع أي من أهل الآفاق والحلال أي وكغير المحرم من أهل الحل إذا دخله أي الحرم لحاجة أي غير إرادة للنسك. (لباب المناسك مع شرحه، ص۹۳).

عمدۃ الفقہ میں ہے:
اہل حرم سے مراد وہ لوگ ہیں جو حدودِ حرم کے اندر رہتے ہیں خواہ وہ وہاں کے مستقل باشندے ہوں یا دوسری جگہ سے آئے ہوں اور خواہ وہ مقیم ہوں یا مسافر، پس جو لوگ مکہ معظمہ میں یا حدودِ حرم میں کسی اور جگہ مثلاً منی وغیرہ میں رہتے ہوں حج کے لیے ان کا میقات حدودِ حرم کے اندر کی تمام سرزمین ہے اس میں جہاں سے چاہیں احرام باندھ لیں لیکن مسجد الحرام یعنی بیت اللہ شریف کی مسجد سے احرام باندھنا افضل ہے اس کے بعد ان کو اپنے گھروں سے احرام باندھنا افضل ہے حج تمتع کرنے والا آفاقی شخص بھی اہل حرم کے حکم میں ہے ۔ (عمدۃ الفقہ: ٤/۹٦ ۔ ۹۸، اہل حرم کا میقات) ۔
اور منی مکہ مکرمہ سے تین ساڑھے تین میل ہے ۔ (عمدۃ الفقہ: ٤/٤۳۸) ۔
زبدۃ المناسک میں ہے: منی مکہ معظمہ سے ایک فرسخ ہے ۔ (زبدہ، ص۱۵۵) ۔
اور ایک فرسخ تین شرعی میل کا ہوتا ہے جس کے تقریباً ٤۸٦٤ ء ۵ کلو میٹر بنتے ہیں ۔ اور منی حدودِ حرم میں داخل ہے ۔
واللہ سبحانہ و تعالی اعلم