بوقتِ احصار بلا قربانی حلال ہونے کا حکم:

صورتِ مسئولہ میں مشہور مذہب کے مطابق بغیر قربانی کے حلال ہونا جائز نہیں ہے، لیکن اگر جنگ وغیرہ کوئی پریشان کن حالات شروع ہو جائے اور اس کے بغیر کوئی چارہ نہ ہو تو بحالتِ مجبوری بغیر قربانی کے حلال ہونا درست ہے، جیسا کہ امام محمد رحمه الله کے نزدیک جائز ہے ۔
ملاحظہ ہو زبدۃ المناسک میں ہے:
دوسری ضرورت یہ پیش آئے کہ ہدی نہیں ملتی بسببِ عجز مسکینی کے مثلاً جدہ یا کامران وغیرہ سے حکام نے جہازوں کو روک دیا بلکہ واپس کر دیا تو اغنیاء وہاں جہاز ہی میں سے اگر مل سکا تو جانور لے کر ذبح کر سکتے ہیں یا واپس ہو کر وطن وغیرہ میں کر لیں گے، مگر مساکین کس طرح کریں تو اس کا حیلہ یہ لکھتے ہیں کہ جب حج کرنے کو جانا ہو تو احرام باندھنے کے وقت یہ شرط کر لے کہ اگر میں محصر ہو جاؤں تو حلال ہو جاؤں گا (اس کو اشتراط الاحلال عند الاحرام کہتے ہیں) تو محصر ہونے کے وقت بغیر ذبح کرنے ہدی کے بھی حلال ہونا جائز لکھتے ہیں، لیکن مشہور مذہب وہی ہے کہ بغیر ذبح کرنے کے حلال نہ ہوگا اور اشتراط کو معتبر نہیں سمجھا گیا لیکن کرمانی اور سروجی نے امام محمد رحمه الله سے روایت کی ہے کہ اگر یہ شرط احلال کی احرام کے وقت ہو اور محصر ہوا تو جائز ہے حلال ہونا بغیر ہدی کے اور کیونکہ اب اس زمانہ میں بہت ہی انقلاب ہو رہا ہے اگر کہیں جنگ وغیرہ شروع ہو جانے کی وجہ سے ایسی رکاوٹیں پیدا ہو جائیں تو ناچاری میں گنجائش نکل سکتی ہے، مطلقاً احلال جائز نہیں ہے ۔ (زبدۃ المناسک: ۴۳۱ ۔ ۴۳۲) ۔
فتاوی ہندیہ میں ہے:

ما لم يذبح لا يحل وهو قول عامة العلماء سواء شرط عند الإحرام الإهلال بغير ذبح عند الإحصار أو لم يشترط، ويجب أن يواعد يوماً معلوماً يذبح عنه فيحل بعد الذبح ولا يحل قبله. (الفتاوى الهندية: ۱/۲۵۵).

واللہ سبحانہ و تعالی اعلم