مشتری سے مقدمہ کے اخراجات وصول کرنے کا حکم:

مقدمہ کے اخراجات مشتری سے وصول کرنے کے بارے میں علماء کا اختلاف ہے بعض علماء جیسے حضرت مولانا عبد الحی لکھنوی رحمه الله وغیرہ فرماتے ہیں کہ مشتری سے مقدمہ کے اخراجات وصول کرنا جائز نہیں ہے، اور دوسرے بعض علماء، جیسے حضرت مولانا رشید احمد گنگوہی رحمه الله وغیرہ فرماتے ہیں کہ مشتری سے مقدمہ کے اخراجات وصول کرنا جائز اور درست ہے، حضرت مولانا مفتی عزیز الرحمن صاحب نے فتاوی دار العلوم دیوبند میں دونوں اقوال نقل کرنے اور تفصیلی کلام فرمانے کے بعد فرمایا کہ حضرت مولانا رشید احمد گنگوہی قدس سرہ کی رائے اس وجہ سے قابل ترجیح معلوم ہوتی ہے کہ اس زمانہ میں ادائے حقوق میں بہت کمی ہو گئی بلکہ اس زمانہ سے پہلے سے یہ مرض عام ہو چکا ہے اسی بناء پر فقہاء نے تصریح فرمائی ہے کہ صاحب حق اگر بقدر اپنے حق کے من علیہ الحق کے مال سے چاہے جس طرح ہو سکے لے لے اگر چہ اپنے حق کی جنس سے نہ ہو ۔ (عزیز الفتاوی، جلد اول، ص ٦۲۷، دار الاشاعت، کراچی) ۔
بنا بریں صورتِ مسئولہ میں مشتری باوجود استطاعت کے ادا کرنے میں تساہل و انکار کرتا ہے اور بائع بمجبوری نالش کر کے قرض وصول کرتا ہے تو اس حالت میں مشتری متمرد سے خرچہ عدالت لینا جائز اور درست ہے ۔
ملاحظہ ہو امداد الفتاوی میں ہے:
اگر کسی کو اپنے حق کی حفاظت کے لیے بہ مجبوری نالش "مقدمہ دائر کرنا " کرنا پڑے اور فریق مخالف کی طرف بالکل مخاصمانہ کاروائیوں کی وجہ سے بہت سے مصارف برداشت کرنا پڑیں تو اس صورت میں خرچہ کا روپیہ بہت سے علماء کے نزدیک و منہم مولانا رشید احمد صاحب رحمه الله جائز ہے ۔ (امداد الفتاوی: ۳/۱۲۳) ۔
مزید تفصیل کے لیے ملاحظہ ہو: (عزیز الفتاوی، جلد اول، ص ٦۲٦ ۔ ٦۲۸، دار الاشاعت ۔ و فتاوی محمودیہ: ۱٦/ ٤٦۰، مبوب و مرتب ۔ و امداد الاحکام: ۳/٤٦۰) ۔
اشکال اور جواب:
اشکال: لیکن اس پر بعض حضرات نے یہ اشکال ظاہر فرمایا ہے کہ مشتری صرف متسبب ہے اور بائع مباشر ہے اور قاعدہ یہ ہے کہ تاوان مباشر پر ہوتا ہے نہ کہ متسبب پر، اس وجہ سے مشتری متسبب سے اخراجاتِ مقدمہ وصول کرنا ناجائز ہے، اس کا کیا جواب ہے؟
الجواب: اس کا جواب یہ ہے کہ فقہاء نے جہاں یہ قاعدہ بیان کیا ہے وہاں مستثنیات بھی بیان کیے ہیں، مثلاً علامہ ابن نجیم مصری رحمه الله نے الاشباہ و النظائر میں فرمایا: "
تضمين الساعي"
اس قاعدہ سے مستثنی ہے، اگر چہ سعایہ محض سبب ہے، لیکن متأخرین علماء نے موجب ضمان بتلایا ہے ۔
ملاحظہ ہو "الاشباہ و النظائر" میں ہے:

القاعدة التاسعة عشر: إذا اجتمع المباشر والمتسبب أضيف الحكم إلى المباشر

وخرجت عنها مسائل

الخامسة: الإفتاء بتضمين الساعي وهو قول المتأخرين لغلبة السعاية. (الأشباه والنظائر: ۱/٤۰۵، الفن الاول في القواعد الكلية).
وفي مجمع الضمانات: وضمن عند محمد رحمه الله وبه يفتى لغلبة السعاية في زماننا. (مجمع الضمانات: ۱/۳٦۲).
وللاستزادة انظر: (معين الحكام فيما يتردد بين الخصمين من الأحكام: ۱۵٦، في بيان القضاء بأنواع الضمانات الواجبة، وكيفيتها. ومجمع الضمانات: ۱/۳٦۰. ۳٦۲. وخلاصة الفتاوى: ٤/۲٦۰، الجنس السادس في السعاية، المكتبة الرشيدية).

واللہ سبحانہ و تعالی اعلم