مبیع کے ساتھ انعامی کوپن کا حکم:

بصورتِ مسئولہ اگر دکاندار سامان کی وہی قیمت لیتا ہے جو عام طور پر بازار میں ہوتی ہے، تو پھر انعام لینے کی نیت سے اس سے سامان خریدنا درست ہے اور انعامی کوپن پر جو انعام ملتا ہے اس کا لینا بھی جائز ہے، اور یہ انعام دکاندار کی طرف سے تبرع ہے، کسی چیز کا عوض نہیں ہے، اور اگر خریدی ہوئی اشیاء انعامی کوپن کی وجہ سے بازاری قیمت سے زیادہ پر فروخت کی جا رہی ہوں، تو اس صورت میں متوقع انعامات حاصل کرنے کی جستجو کرنا ناجائز اور حرام ہے، اس سے بچنا ضروری ہے، کیوں کہ ایسی صورت میں یہ قمار میں داخل ہو جائے گا جو شرعاً حرام ہے ۔
ملاحظہ ہو امداد الاحکام میں ہے:
یہ معاہدہ جائز ہے اور بائع کی طرف سے تبرع ہے اور تبرع کو کسی شرط سے مشروط کرنا جائز ہے ۔ (امداد الاحکام: ۳/۳۸٦) ۔
حلال اور حرام میں ہے:
قریب قریب یہی نوعیت معمہ کی بھی ہے، اس میں بھی معمہ پُر کر کے بھیجنے والا فیس ادا کرتا ہے، حل صحیح نکل آئے تو زیادہ رقم ملتی ہے ورنہ اصل پیسے بھی واپس نہیں ہوتے، ہاں، اگر معمہ بھیجنے والوں سے کوئی فیس نہ لی جائے تو یہ صورت درست ہو گی اور اس رقم کی حیثیت خالص انعام کی قرار پائے گی ۔ (حلال و حرام، ص ۳۸۱) ۔
ہبہ کو کسی شرط کے ساتھ مشروط کرنا جائز اور درست ہے ۔
ملاحظہ ہو فتاوی شامی میں ہے:

قوله والهبة والصدقة كوهبتك هذه المأة أو تصدقت عليك بها على أن تخدمني سنة،

وفي جامع الفصولين: ويصح تعليق الهبة بشرط ملائم كوهبتك على أن تعوضني كذا. (فتاوى الشامي: ۵/۲٤۹، باب ما يبطل بالشرط الفاسد، سعيد).

جدید معاملات کے شرعی احکام میں ہے:
اگر کوئی شخص مشروط طور پر ہبہ کرے تو ہبہ صحیح ہو گا یا نہیں؟ اس بارے میں ضابطہ یہ ہے کہ اگر کوئی مناسب شرط عائد کرے تو ہبہ اور شرط دونوں صحیح ہیں اور اگر کوئی غیر مناسب شرط عائد کرے تو ہبہ صحیح ہو گا اور شرط باطل ہو گی ۔ (جدید معاملات کے شرعی احکام: ۲/۸۷، ہبہ میں شرط لگانے کا حکم) ۔
مزید ملاحظہ ہو: (جدید معاملات کے شرعی احکام: ۱/۱۲٦، انعامی کوپن یا کارڈ پر اشیاء خریدنا) ۔
واللہ سبحانہ و تعالی اعلم