ایجنٹ کے کام نہ کرنے پر رقم واپس کرنے کا حکم:

بصورتِ مسئولہ اگر زید نے عمر کو رقم دی کہ عمر اس کا کام کرا دے گا اور کام کی ذمہ داری قبول کی جیسے عام طور پر ہوتا ہے تو کام نہ ہونے کی صورت میں عمر پر رقم کی واپسی کی ذمہ داری آتی ہے۔
مثلاً اگر کسی کو روٹیاں پکانے کے لیے اجرت پر لیا اور روٹیاں تنور سے نکالنے سے پہلے جل گئیں تو اس پر تاوان آئے گا۔ ملاحظہ ہو در مختار میں ہے:

ولو احترق (أي الخبز) قبله (قبل إخراجه) لا أجر له ويغرم اتفاقاً لتقصيره، درر وبحر. وفي الشامية: قوله لتقصيره أي بعدم القلع من التنور. (الدر المختار مع رد المحتار: ٦/۱٦، سعيد).

اسی طرح اگر کسی نے کھانا پکانے والے کو مقرر کیا کہ ہمارے لیے کھانا پکاؤ اور اس نے کھانا جلا دیا، یا ٹھیک نہیں پکایا تو اس پر تاوان آئے گا۔

قال في الدر المختار: فإن أفسد أي الطعام الطباخ أو أحرقه أو لم ينضجه فهو ضامن للطعام. (الدر المختار: ٦/۱۷، سعيد).

نیز اگر کسی نے دودھ پلانے والی کو بچہ کو دودھ پلانے کے لیے کرایہ مقرر کیا اور مرضعہ نے بکری کا دودھ پلایا تو اجرت کی مستحق نہیں ہو گی۔

وقال في الهداية: وإن أرضعته في المدة بلبن شاة فلا أجر لها، لا نها لم تأت بعمل مستحق عليها، وهو الإرضاع فإن هذا إيجار وليس بإرضاع. (الهداية: ۳/۳۰۵).

لیکن اگر عمر نے یہ کہا ہو کہ کام کا میں ذمہ دار نہیں ہوں، صرف بطورِ وکیل آپ کی رقم آفیسر تک پہنچاؤں گا تو پھر عمر پر ذمہ داری نہیں ہے۔

قال في البدائع: ومنها أي من حقوق التوكيل وأحكامها، أن المقبوض في يد الوكيل بجهة التوكيل بالبيع والشراء وقبض الدين والعين وقضاء الدين أمانة بمنزلة الوديعة. (بدائع الصنائع: ٦/۳٤، كتاب الوكالة، سعيد).

اور اگر کسی قسم کی صراحت نہ کی ہو تو پھر عرف کو دیکھا جائے گا اور عرف میں اتنی بڑی رقم کام کی ذمہ داری پر ہی دی جاتی ہے اس لیے عمر ذمہ دار ہو گا۔ ہاں اگر عمر واقعی مجبور ہے تو زید اس کے ساتھ رعایت کا معاملہ کر لے۔
واللہ سبحانہ و تعالی اعلم