بیرونی ملک میں قربانی کرانے کا حکم:

بصورتِ مسئولہ پہلی صورت میں اگر قربانی والے مشتری نے ایجنٹ کو مکمل اختیار دیا ہو کہ آپ جس کو چاہے میرا جانور حوالہ کر دے اور بظاہر ایسا ہوتا ہے، تو جو شخص ہندوستان میں جانوروں کی نگرانی کرتا ہے وہ قربانی والے کی طرف سے مشتری کا وکیل بالقبض بن گیا، اس لیے ہلاکت کی صورت میں تاوان مشتری پر آئے گا بائع پر نہیں آئے گا، اور وکیل کی رؤیت موکل کی رؤیت بن گئی، اور یہ معاملہ جائز ٹھہرا ۔
(۲) دوسری صورت میں خریداری کے وکیل کے لیے سو رینڈ حق محنت وصول کرنا جائز ہے، اور اگر چار سو سے کم میں خریدا تو بقیہ رقم کے بارے میں دو صورتیں ہیں: (الف) ایک یہ ہے کہ موکل نے کہا ہو کہ زائد رقم بھی آپ رکھ لیں، تو پھر اپنے لیے رکھ سکتا ہے، (ب) اور اگر یہ نہ کہا ہو تو اس کو واپس کرنا ضروری ہے ۔
حضرت تھانوی رحمہ اللہ سے اس قسم کا ایک سوال کیا گیا، سوال و جواب کا خلاصہ حسبِ ذیل ملاحظہ ہو:
سوالـ: اگر کوئی طبیب کسی کے لیے دوا بنا دیں اور زیادہ دام مریض سے وصول کرے تو زائد دام لینا جائز ہے یا نہیں؟
حضرت تھانوی رحمہ اللہ نے اس کے جواب میں تحریر فرمایا: اگر مریض کی اجازت سے اپنے صرف میں لایا تو جائز ہے، ورنہ واپس کرنا ضروری ہے اور اگر وہ لوگ معلوم نہ ہوں تو ان کی طرف سے صدقہ کرے ۔ (امداد الفتاوی: ۳/۱۱۵) ۔
واللہ سبحانہ و تعالی اعلم