بعض کتب سے ذکر بالجہر کے بدعت ہونے کا شبہ:

قاضی ثناء اللہ پانی پتی تفسیر مظہری کے مصنف رحمه الله کے کلام سے مترشح ہوتا ہے کہ ذکر سری افضل اور ذکر جہری جائز ہے: والأمر بالإخفاء إنما ہو شفقۃ لا لعدم جواز الجہر أصلاً۔ جب ذکر جہری جائز ہے پھر اس کو بدعت کیسے کہا جائے گا اس لیے بندۂ عاجز کے خیال میں بدعت سے لغوی معنی مراد ہے اور لغوی بدعت کبھی واجب ہوتی ہے جیسے اہل باطل کے مقابلہ میں دلائل مرتب کرنا اور کبھی حرام ہوتی ہے جیسے مذاہبِ باطلہ کے مسائل کو اپنانا اور کبھی مندوب ہوتی ہے جیسے مساجد کے مینار کا بنانا اور کبھی مباح ہوتی ہے جیسے چھلنی کا استعمال کرنا اور کبھی خلاف اولی ہوتی ہے جیسے مساجد کی دیواروں کی تزیین کرنا۔

قال في الهندية: لا بأس بنقش المسجد بالجص والساج وماء الذهب والصرف إلى الفقراء أفضل كذا في السراجية. (الفتاوى الهندية: ۵/۳۱۹).

تفسیر مظہری میں بدعت اولی کے مقابلہ میں آئی جو خلافِ اولی کے معنی میں ہے، اسی طرح دیگر فقہاء کے کلام کو سمجھ لیں۔ چونکہ صاحب تفسیر مظہری نقشبندی سلسلہ کے بزرگ تھے اور ان کے ہاں ذکر بالجہر ایک نئی شئی ہے۔ نیز حضرت مولانا اشرف علی تھانوی رحمه الله کے مضمون کو بھی ذہن میں رکھ لیں وہ فرماتے ہیں:
اقوال بعض فقہاء کے بعض پر حجت نہیں ہو سکتے یہ خاصہ ہے اختلافِ اقوال کا، و البسط فی المطولات، راقم کی رائے ناقص میں قول مجوزین کا صحیح اور ان میں سے مفصلین کا قول راجح معلوم ہوتا ہے کہ سب آیات و احادیث و اقوال علماء کے جمع ہو جاتے ہیں،
علي أن خير الأمور أعدلها

الخ. (
امداد الفتاوی:
۵
/
۱٦۹
)۔
واللہ سبحانہ و تعالی اعلم