دنیوی علوم حاصل کرنے کا حکم:

زندگی کے ہر شعبہ میں مسلمان کو ضرورت پڑتی ہے اور اس کے لیے ماہرین کی تلاش ہوتی ہے اگر مسلمان کسی بھی دنیوی شعبہ میں حصہ نہیں لیں گے تو غیر مسلم کے سپرد ہو جائیں گے اور اس کی وجہ سے کافی مشکلات کا سامنا ہو گا، بنا بریں دنیوی علوم حاصل کرنا اور اس میں ترقی کرنا بھی جائز اور درست ہے بلکہ اسلام اور اہل اسلام کی خدمت کی نیت ہو تو ماجور ہو گا، البتہ مسلمان بچیوں کے لیے خاص پر دہ وغیرہ کا اہتمام ہونا چاہیے اور مخصوص بچیوں کے اسکول میں تعلیم حاصل کرنا زیادہ اولی اور فتنہ سے دور ہے۔
حضرت مفتی عبد الرحیم صاحب لکھتے ہیں: ایسے اسکول قائم کرنا جس میں بقدرِ ضرورت انگریزی وغیرہ دنیوی علوم و فنون سکھائے جائیں اور صنعت و حرفت کے کلاس قائم کرنا، جس سے حلال روزی حاصل کرنے میں مدد مل سکے، بلاشبہ جائز اور کارِ خیر اور موجبِ اجر و ثواب ہے لیکن دینی تعلیم کو اور دینی مدارس کی امداد کو مقدم سمجھا جائے دینی تعلیم سے اعراض کر کے اور دینی مدارس کو نازک حالت میں چھوڑ کر دنیوی تعلیم میں منہمک ہو جانا اچھا کام نہیں ہے،

اولاً بچوں کو قرآنِ پاک کی صحیح اور باقاعدہ تعلیم دی جائے۔ شرعی احکام اور ضروریاتِ دین سے مناسب طریق سے واقف کیا جائے، اُن کے قلوب میں اسلام کا ایسا نقش جمایا جائے جس سے اسلامی جذبات اور ایمانی احساسات پختہ اور پائیدار ہوں تاکہ اُن کو کوئی قوت سرد نہ کر سکے اور عملی حالت کو کوئی طاقت بدل نہ سکے
(
فتاوی رحیمیہ:
۵
/
۱۱۸
، مکتبۃ الاحسان، دیوبند)۔
حضرت مفتی محمد فرید صاحب رحمه الله رقم طراز ہیں: لڑکیوں کے لیے اسکول اور کالج میں تعلیم حاصل کرنا بذاتِ خود ممنوع نہیں ہے۔ بذاتِ خود ممنوع بے پر دگی، اختلاط اور آزادی جیسے امور ہیں۔ نیز اصولِ شرعیہ کی بنا پر وہ امر بھی ممنوع شمار ہوتا ہے، جو کہ دیگر ممنوعات کا ذریعہ ہو۔ (فتاوی فریدیہ:
۱
/
۲۰٤
، کتاب العلم)۔
مزید تفصیلات کے لیے ہمارا رسالہ "سبیل الخیرات فی جماعات المتنقبات" ملاحظہ کیا جا سکتا ہے۔
واللہ سبحانہ و تعالی اعلم